Ish-kryeministri i vendit, njëherit kryetari i AAK-së, Ramush Haradinaj ka dhënë arsyet e tij se pse kanë votuar mocionin e LDK-së për rrëzimin e qeverisë Kurti.

“Kurti me vendimin e qeverisë më 20 Mars ka marrë vendim për heqjen e tarifës, fillimisht për landën e parë, ndërsa e ka obligu vetën për heqjen e tarifën krejtësisht më 1 prill.

AAK e ka votuar mocionin pikërisht për këtë arsye që Kurti e ka heq tarifën në mënyrë të gabume.

Tarifa ka pas mu heq dikur, por në vend që m’ja dhanë SHBA-së, ai e ka heq atë pa kundërvlerë, duke e coptuar vendimin”, ka thënë Haradinaj në një intervistë për Insajderin.

Kreu i AAK-së ka shtuar tutje se Kurti e ka mashtruar Kosovën duke i thënë reciprocitet.

“Që nga fillimi ka mashtru, ka pas ofertë mashtruese dhe ka mendu me mashtru Kosovën duke e copëtu vendimin për tarifën.

Vendimi për rrëzimin e qeverisë s’është i imi, por i partnerit qeverisës, ne vetëm e kemi mbështet këtë mocion. Pasi që Kurti jo vetëm për tarifën por ka pasur logjikë të gabuar, përfshirë këtu edhe diskriminimin buxhtor”, shton ai.